Структурна-словаўтваральныя асаблівасці моналексемных тэрмінаў сухапутнага транспарту лесу ў беларускай мове

Abstract

У апошнія дзесяцігоддзі беларускія лінгвісты прыкладаюць значныя намаганні па ўпарадкаванні нацыянальнай тэрміналогіі. Тым не менш многія пытанні да гэтага часу распрацаваны недастаткова. У прыватнасці, застаецца несістэматызаванай беларуская лесатэхнічная тэрміналогія. Распрацоўка галіновай тэрмінасістэмы немагчыма без грунтоўнага аналізу структурна-граматычных і словаўтваральных асаблівасцей тэрмінаў. Апісанне фармальнай структуры тэрмінаў дазваляе зрабіць высновы пра асаблівасці іх фарміравання і функцыянавання, вызначыць заканамернасці іх утварэння, што, безумоўна, дазваляе правесці сістэматызацыю і ўпарадкаванне галіновай тэрміналогіі. Мэта даследавання заключаецца ў апісанні фармальнай структуры беларускіх аднаслоўных найменняў, зафіксаваных у "Слоўніку тэрмінаў па сухапутным транспарце лесу". Зварот да згаданага выдання прадыктаваны імкненнем правесці аналіз лесатэхнічнай тэрміналогіі беларускай мовы, зафіксаванай у лексікаграфічных выданнях ХХ-ХХІ стст.